Isang masiglang kinabukasan ang sumalubong sa mga mag-aaral ng Junior High School sa Mabalor-Catandala Integrated School matapos pormal na isagawa ang Blessing at Turnover Ceremony ng dalawang bagong silid-aralan, Marso 26.

Ang proyekto ay bunga ng matibay na pakikipagtulungan sa pagitan ng paaralan, pribadong sektor, iba pang stakeholders at ng Pamahalaang Lokal ng Ibaan (LGU). Ito ay binubuo ng isang palapag na may dalawang yunit ng classrooms. Layunin ng inisyatibong ito na masiguro ang kahandaan ng pasilidad at magbigay ng isang ligtas, maayos, at de-kalidad na kapaligiran para sa pag-aaral ng mga kabataang Ibaeño.

Sa ginanap na seremonya, binigyang-diin na ang bagong gusali ay simbolo ng pagkakaisa ng mga stakeholders sa pagtataguyod ng edukasyon. Sa pamamagitan ng karagdagang espasyong ito, inaasahang mas mapalalawak pa ang kapasidad ng paaralan na maghatid ng sapat na kaalaman sa dumaraming bilang ng mga mag-aaral sa nasabing paaralan.